|  |
|
|
|
Колям-ö ми водзö вылö?
Автор: Сергей ЕЛФИМОВ
Дата публикации: 09.03.2010
Язык статьи:
Окотапырысь лыдди «Коми му» газетысь журналист Леонид Лыткинкöд гижöда сёрни. Воис сьöлöм вылö медводз «Чужан кывнымöс кедзовтам асьным?» юргижöдыс. Веськыда вайöдöма мыжсö и мыжасö. Мыжыс миян чужан кывйысь öтдортчöмын да сiйöс кедзовтöмын, а мыжаöсь асьным.
Бöрья кадö Сыктывкарын пыр тшöкыдджыка кывлан коми сёрни. Тайö йитчöма абу коми войтырлöн содöмкöд либö мукöд кывья йöзлöн комиасьöмкöд. Ставыс сыын, мый матiгöгöрса сиктьясысь войтыр локтöмаöсь карö бурджык олöм корсьны. Но майшöдлö, мый и асьныс найö, и налöн ныв-пияныс регыд рочмасны. Oд Сыктывкарын абуöсь ни коми кывья детсадьяс, ни коми школаяс. Ывла вылын, лавкаясын,учреждениеясын сёрнитöны рочöн. А комиöн кö шыасян, пыр и веськöдасны: «Говорите по-человечески! Я не понимаю!» Тайöс ме висьтала ас олöмысь вöвлöмтор.
Со и кöсья шуны, ми кö, комияс, асьным огö кутöй быдлаын да быдöнкöд сёрнитны государственнöй кывьясысь öтиöн—комиöн, мам кывлöн тöдчанлун йылысь некутшöм сёрни оз ков панны. Миянлы колö зумыда кутчысьны ас му вылын. Чужан кыв кутшöм сöвмöдöм йылысь сёрни вермас лоны, кор ми ого вермои комиöн гöгöрвоöдны-вежöртны талунья олöмыслысь воськовьяссö. Дерт, вöр-ватö серпасалiгад выль кывьясыд оз ковны. Но ковмасны налы, кодьяс öнi нин ёртасьöны öтуввезкöд.
Сэк жö, кöть 2009 восö вöлi йöзöдöма Коми кывлöн воöн, нинöм олöмас эз вежсьы. Уналы öд гöгöрвоана, мый тайöс вöлi вöчöма суйöрсайса водзын асьнымöс петкöдлöм могысь. А мыйла, шуам, Коми кывлöн воö эз позь гижöдны быд коми мортöс сылöн корöм серти дзонь во кежлö дон босьттöг кутшöмкö öти кывья петас вылö? Либö восьтны коми школаяс, детсадьяс. Торйöн кö, тайö колö сöмын миянлы, коми войтырлы. А восö котыртысьяслы оз вöлi ков. Со и воыс, позьö кö сiдз шуны, колис сьöдас.
Кутшöмкö тöдчана воськовьяс эз артмыны эз сы вöсна, мый тайö во кежлас эз бура лöсьöдчыны. Медводз сы вöсна, мый коланасö вöчны колö смеллун да ыджыд кывкутöм. Oнiя «Коми котырса» да республикаса торья веськöдлысьяслöн выныс ни вежöрыс эз судзсьы вöчны кольöм восö збыльысь Коми кывлöн воöн. А, гашкö, эз и кöсйыны?
Нöшта менö майшöдлö сiйö, мый эз ло кыпöдöма чужан кывлöн аскиа лун йылысь колана сёрни. А öд талун тшöкыда торкалöны вужвойтырлысь правояссö. Сэк жö та йылысь этша на мый гижöны миян газетьяс, этша петкöдлöны телерадио-передачаясын.
Омöль и сiйö, мый коми кыв вылын небöгьяс эз кутны воны лыддьысьысьясöдз. Сэсся и доныс на вылö ёна содiс. А мый нин шуны, кор пöдлалöны коми школаяс. Но оз кö ло татшöм школаыс, оз ло и коми лыддьысьысьыс.
Кöсья висьталыштны неуна и коми кывлöн сöвмöм йылысь. Сiйö медводз сöвмö выль кывьяс отсöгöн. Налöн коланлуныс вывтi ыджыд. Сöмын тöрытья лунöн олысьлы оз ковны татшöм кывьясыс. Со и элясьöны татшöмьясыс, кодьяс эз велöдны, оз велöдны да оз кöсйыны велöдны ассьыныс кывнысö. Налы тырмö кыв-мöдкоймöд. Сяммасны кö чолöмасьны и. Сэкжö ме, коми морт, ог кöсйы, мед ёгöсьтiсны государственнöй кывьясысь öтиöс. Со и артмö, мый роч кывйыд кö—ид нянь, комиыс—кача нянь да нöшта на и кыд сора.
Огжö эскы и, мый коми кывлöн дженьыд нэмыс. Мам кывным кусас, лэдзам кö ми сiйöс кусöдны ас пытшкысь да ас гöгöрысь. Сiдзкö, колö, медым миян пиысь быдöн да быдлаын кутiс сёрнитны да гижны комиöн.
Дерт, «Коми котырöн» веськöдлысьяс та вылö вермасны шуны, мый тадзи пö дöзмöданныд мукöд сёрниа войтырöс. Но ме ньöти ог сулав налы паныд. Сёрнита сöмын чужан кывйöс дорйöм йылысь. Мед эськö и менö гöгöрвоасны. Кодi нö менö дорьяс? Сiдзкö, ассьыным кывнымöс колö дорйыны аслыным! Кад нин налы, кодьяслы абу веськодь чужан кывйыс, öтувтчыны, мед водзö сöвмöдны ассьыным кыв. И оз ков повны таысь. Oд сёрниыс мунö сы йылысь, колям-ö ми, коми войтыр, водзö вылö.
Источник: Коми му
|
|
|
|
|
|
 |
|
|
РЕКЛАМА
|
|
|
